di Rossano Ferrati

Tratta da “Cronache dal Condominio – Il Conte Ziliolo” disponibile in versione cartacea sul sito “Il mio libro.it” e, su ordinazione, nelle librerie Feltrinelli. Oppure in versione e-book sul sito www.lulu.com

Quand a Frara i l’ à mandà,
‘zirca un mez millenni fa,
Lucrezia Borgia, la papalina
la sfotteva sta’ zittadina.
Ma dop che al pan l’ha assaggià,
un po’ al giudizi la cambià,
e davanti a la salama
l’ è crolada, la gran dama.
Dop ad liè tanta altra zent,
amig, contrari o indifferent,
gli’ è vanzà affascinà
da gl’ incant ‘d sta gran zità.Oman, donn, vec e putin
e, purtropp, anch tant cretin
che pr’i stian‘d sta bela tera
i à purtà parfin la guera.
E dop l’ultima, c’la grossa,
in zità ghe stà na scossa.
Paolo Mazza, al Cavalier,
l’ha dà a tuti un gran piaser.
Con grand’arguzia l’ha purtà
la nostra Spal in serie A,
dove spess l’ha mis a gogna
Juve, Milan e anch Bologna.
Se la vtoria l’arrivava
con grapin as festeggiava.
Se un parez al iera, a la fin,
as consolavan con pinzin.
E se propria andava mal,
parchè butars in tal canal?
A’ieran zuan e ragazit,
e a balar s’andava drit.
Ma ades, par esar sinzer,
l’ha n’è più cumpagn a ier,
ormai dal temp a n’è pasà
e as sen scurdà la serie A.
Con l’ariv dal domiladies
al magon l’è dvantà pes,
e a son propri dre pensar
cum poder far, a cambiar.
Se i caplaz is magna ancor
Par la Spal gli è sol dulor,
se i salam gli è sempar bontà
i mie cavì i s’è imbiancà.
Al castel, l’ultim dl’an, al brusa
par la Spal an gh’ è na scusa.
Gli è tut pin il sal da bal
Ma pr’ i vcin n’è più carnval.
Con la crisi imperante,
la muneda l’ è calante,
la riforma d’Berluscon
l’ha sluntanada la pension.
Mi a podria continuar
e ad tant’altar guai, rimar,
ma la pasta ormai l’è cota
e al miè stomag al borbotta.
E perciò a lass lì d’pensar,
vag a taula, a magnar
e a riguard a d’la faccenda,
basta pianzar in s’la merenda.
Se mi ancor a dev laurar
mei che star con gnent da far,
e se tut par mi al va mal
…..mo lass cal vaga…..e………..
Forza Spal.